10 個新娘分享 - 我的尋褂記

data_article_detail.is_new_Slide_show = False
10 個新娘分享 - 我的尋褂記
為了尋找 “the one”,不少準新娘會上三四十家婚紗店試身,有的更甚至會上到深圳廣洲度身訂造。然而,要找一套完全稱心稱身,價錢不「勾筆」,又要得父母和老爺奶奶 approve 的裙褂,其實比尋覓 “the one” 更困難,事關香港的裙褂店不多,絕大部分準新娘大約試三四家便要決定了,想多心也難。在此,10 位新娘跟大家分享她們尋褂的故事,且看看她們如何在有限的選擇當中覓得她們的裙褂之王吧!
不可穿有龍鳳圖案褂?

同學仔yingx2:「我和家人都是基督徒,而我對傳統都是抱著欣賞和尊敬的態度,沒有甚麼忌諱,可是母親是較保守的基督徒,竟然提出不能穿龍鳳褂這個要求 (潮褂有龍鳳都不行)。要找沒有龍鳳的褂顯然是個有十級難度的任務,至少我沒見過身邊有朋友結婚是穿非龍鳳的褂。後來道聽途說,聽過有人穿花褂出嫁。無心插柳地,我在一次婚展 expo 上,看到鴻運繡莊有花褂 display,有實物摸摸拼拼覺得不錯,始終是傳統褂 cutting 比較修身,穿上身好看得多,於是下了訂金。」
我的頭褂褂皇

同學仔dream.about.yan :「由一開始,我對裙褂的感覺其實不太好,覺得有點老土,而且著得人好肥,但結婚一世人一次又非著不可。我自己很著重意頭,又有潔癖,所以非頭褂不選,就乖乖付了 HK$500 訂金。因為這件是褂皇頭褂,非常挺身。金銀線好 sharp,立體的刺繡漲卜卜,龍鳳構圖亦很美,當日著上亦無肥腫難分的感覺。」
原來著潮褂先最傳統?

同學仔dckm:「婚紗店負責人同我講,人人以為傳統褂好傳統,其實只有香港人先會著。一河之隔嘅深圳已經無人著,更唔好講北京同台灣。傳統唔傳統真係觀點與角度,佢話兩岸三地古裝片都無人著港式傳統褂出嫁就知,反而潮褂款式其實歷史上就一定耐過傳統褂,係清朝已有。其實,潮並唔係潮流咁解,佢一講完我即刻覺得有藉口同長老解釋,其實潮褂仲傳統啊!人人以為褂要揀 fit 身,其實褂最好揀鬆少少咁先至好意頭,有大富大貴,有餘有剩之意。網上流傳揀褂要揀潮正襟,正襟係大婆著,斜襟係二奶著,實情係古代二奶唔係明媒正娶唔會有褂著,反而要諗嘅係,正襟兩邊對稱,易著啲,斜襟兩邊比較拋,咁就難 carry 啲。同埋褂一定要一件過,唔可以係拼布。我最後揀左正襟嘅大花圖案,其實亦都係我最鍾意嗰款,好 colorful 好開心,重點係呢款出面未見過。」
感受母親對女兒的愛

同學仔florencesss:「由於對魚魚褂念念不忘,決定去冠南華再試多次!因為 HK$5,000 實在太 out budget,我直接問 sales 姐姐有沒有舊一點點的褂,好快佢就搵到一件同款第八手,試上身比前一天那件更 fit 身,從表面看也很新淨,媽咪很滿意。正當我打算俾錢時,媽咪突然拎張信用卡出黎搶著埋單!佢話裙褂應該是由媽媽準備給女兒的,雖然貴但不介意,只要求我 big day 當日著耐少少影相。媽咪 I love you!」
送贈未來老婆的大禮

同學仔 traceycms :「職員拎左一套褂后同大五福俾我試,件褂后勁啱身,而且勁閃,我仲諗...佢唔會拎左頭幾手嘅俾我試卦,一定勁勁勁貴。一問之下 原來係第五手,HK$6,800,但真係新到以為第三手咁上下。之後再試同樣係大五福第五手,都幾好 但都係褂后靚好多!然而,因為價錢,真係好難決定…心思思諗住叫佢搵有無舊啲會平啲嘅,點知得第六手褂后,但著上身一樣閃令令, 分唔出第五同第六分別,而且身上有埋金魚,我就更加鍾意!BF 見我眼甘甘,就話如果我鍾意就要依件啦,心郁郁...人生只會著一次褂,貴少少,好快都賺返啦,但唔租,可能將來就會後悔!所以即刻笑微微咁話好,哈哈,哈,好幸福啊!」
不再似金魚和錦鯉

同學仔Yukomama:「一試完潮褂出黎,楊生第一句話,呢件無咁似金魚囉,我暈…咁即係好唔好睇呀,佢就話好睇,但係我就覺得好似好暗淡,sales 就話其實影相出黎好 sharp,佢即刻幫我影左張相,一睇!我就有叮一聲感覺喇!成個感覺睇落好精神仲好似瘦左咁。之後一致決定 Cocoon 嘅潮褂陪我出嫁!題外話,楊生除左話我著褂后似金魚,好姊妹問褂皇呢,佢話褂皇直頭似錦鯉,真係想封住佢個咀。」
KO 過萬蚊褂?

同學仔jojobee:「大五福,即褂后 頭褂,折實後都係要過萬。褂后紅色比較多,因為係頭褂關係,佢比之前試嗰兩套更閃更硬身。原本媽咪緊張到要我立即決定,但最後都俾我說服左睇埋其他先。 試晒之後,媽咪同 sales 姐姐都覺得我著呢套最好睇。經過爸爸一輪講價後就即刻俾錢,佢話只要我中意就得。嗰一刻真係好感動,好感激我有一個咁錫我嘅爸爸媽咪。呢套就係我套褂喇!完全無心理準備下就 KO 左!」
“bling bling” 水晶褂 夠 young 夠立體

同學仔yanandshing:「My dream 褂要圖案立體,多金銀線,但著上去又要可愛,唔會感覺老左。非潮褂,又要符合呢個條件,只有鴻運繡莊既 bling bling 水晶褂。第一眼望到佢已經心心眼,每條邊邊都釀上水晶,連衫袖和褂裙都有,非常 details。紅色既地方夠紅,金色既夠金,而且龍鳳圖案都係卜起,望落去好立體。多左 bling bling 水晶,著上身個感覺就唔同哂,可愛好多,唔會老左。而且呢個五福石榴圖案亦好豐富,金銀線夠多夠密。」
幸福滿滿的龍鳳繡

同學仔:「對於裙褂,小五福和大五福我都沒有多大興趣,唯有向中五福埋手。最後選擇是金龍金鳳 (鳳邊) 平腳中五福,希望我沒有記錯『她』的名字。我忘記這套裙褂是我試了多少套之後才出現,但一試上身,我‧好‧喜‧歡‧啊!還有,好襯我,嘻嘻。婚禮當日,穿上自己喜歡又滿意的龍鳳大紅裙褂,幸福感滿滿,雖然我不知道『她』是多少手,但龍鳳圖案看上來十分立體凹凸,當日的我經常忍不住手摸那脹卜卜的龍鳳繡呢!」
連未來奶奶都滿意的褂皇

同學仔smileyuki:「經 sale 姐姐介紹先知有彩底密地褂皇,即是係傳統褂皇的基礎上再繡上紅線, 整件褂呈粉紅色,我覺得好靚,我試的第一件係第 7 手,件褂較細件同緊身,而且金銀線唔太閃同有少少舊,價錢較實惠,未八折前 HK$6,800,但未來奶奶就想要件新淨啲,姐姐就拎左件第 3 手嘅褂皇俾我試,試上身屋企人好滿意,件褂好新淨,金銀線好 sharp,著上身唔會太緊,奶奶覺得呢個 size 端莊啲,我自己都好鍾意,於是就決定左 big day 著嘅靚靚褂皇,好開心。」

Edit_Connie (按此進入我的WOW)