未入門已出事─準新娘大戰未來奶奶 (上)

data_article_detail.is_new_Slide_show = False
未入門已出事─準新娘大戰未來奶奶 (上)
平日見面,大家有講有笑,就以為自己與未來奶奶關係幾好,以為好安樂日後嫁入門都無問題?勸你千祈咪開心得太早!未入門,只是搞婚禮就已出事!

以下5宗真實個案,新娘子與未來奶奶都為婚禮而產生衝突,認真是「跟住矛盾去搞婚禮」!

擇日篇:
新人搵師傅擇好吉日,然後向「四大長老」(即雙方家長)報告,當時長老們沒有意見,新人就直接落實日子並進行場地預訂。怎料一個月後,未來奶奶爆發:「點解揀我農曆生日月份嚟結婚?」

解決方法:部分長老對中國婚嫁禮儀一知半解,此時最好由擇日師傅出馬,以他專業可靠的說話說服長老。以上個案中,師傅指大日子日期與長輩同一月份舉行並無不妥,未來奶奶也就閉咀了。

禮金篇:
正所謂「講錢傷感情」,亦常聽說女家說「我哋唔係賣女」,但一提到禮金數目便見真章。新人認為禮金數目太大會增加兩口子的經濟負擔,但女家嫌金額太少顯得寒酸。

解決方法:其實,長老心裡明白新人的經濟負擔,只是礙於面子及三姑六婆的閒言閒語而希望收到較大份禮金。新人可向女家建議,禮金包多啲,但新人可收回親友送贈的人情以作幫補。

開支篇:
搞婚禮一闊三大,新人當然想慳得就慳,同時又希望擁有一個完美的婚禮。未來奶奶對龐大的開支表示驚訝,覺得婚紗package、影PW等花費甚多:「點解咁貴呀?人地呀邊個邊個搞婚禮都唔洗咁貴!」

解決方法:老套但又最湊效的一招-「隱瞞」實際開支。除非你下下要飛歐洲影相,否則價錢呢,講多講少,都不是很難的事。

晚裝篇:
新娘去試晚裝,未來奶奶預先放風,表明唔可以揀指定顏色的晚裝!粉紅色代表二奶身份,唔揀得;藍色晚裝猶如喪服,唔揀得;還有新娘最鍾意的Tiffany Blue晚裝,唔夠喜慶一樣No Way!

解決方法:長輩說到底都是為對新人好,希望利利是是,百無禁忌;亦礙於三姑六婆閒言閒語,所以對新娘子打扮諸多限制!不過,奶奶一般重視只婚禮當日的造型,其他如婚攝打扮一概不理,新娘不妨在大日子當日遷就一下奶奶,影婚紗相時一於想著乜就著乜!

奶奶衫篇:
有時候,三姑六婆你一言我一語,對婚禮諸多批評,例如陪未來奶奶去揀晚裝,眼光奇差,硬會幫手揀一些「明星、model著都搞唔掂」的款式,例如:極有登台feel的珠片衫、一味要又閃又威又誇張的晚裝等。但不幸奶奶「受人迷惑」,新人不好意思相勸,唯有無眼睇。

解決方法:未來奶奶要揀套靚衫,無非一尊重場合,二自己都想靚,三或多或少不讓新娘專美。(始終女人嘛,你懂的)建議子女及未來新抱陪她一起試裙, 令她覺得並非所有spotlight 只在新娘身上,感到關注及尊重,自然較易接納別人的意見。

立即睇埋下集個案!

以上個案皆由婚享同學會匿名同學分享

Text_Fanny (Editor's Blog)