相愛十年!楊洛婷與老公Tim 甜蜜更勝婚前

data_article_detail.is_new_Slide_show = False
相愛十年!楊洛婷與老公Tim 甜蜜更勝婚前
要男朋友或老公講一聲「我愛你」,真係難過登天。但藝人楊洛婷Rabee'a 和老公阿Tim@ Dear Jane就完全無呢個問題!兩人自小在外國長大,受西方文化影響,經常將愛掛在咀邊,人前人後大講情話,愛得痴纏,他們相愛十年的愛情保鮮秘訣當然唔止靠把口!
Rabee’a與Tim兩個在訪問中大放閃光彈,差點令小編招架不住!當Rabee’a大爆老公婚後更加口甜舌滑,每晚臨瞓前都會講下有幾愛佢,又會大讚「You are so beautiful!」百聽不厭,認真甜到漏! Tim就情深款款回冧老婆:「我望住佢就覺得好浪漫!」

圖:rabeeay @instagram
愛情從來都靠雙向互動,阿Tim話要靠行動話俾對方知有幾愛佢,而Rabee'a亦識做:「見到老公對自己咁sweet,自己都對佢sweet D!」工作以外,兩人都會去旅行享受二人世界。

圖:rabeeay & dearjanetim@instagram
要為婚姻關係保鮮,又點能夠單靠把口講,又或只靠大時大節製造驚喜?真正的浪漫和甜蜜,就是最老套那句:每日都是情人節。Rabee'a 和Tim剛好相愛10年,既如老夫老妻般坦蕩蕩,但同時又似熱戀中的情侶愛得火熱,閒時在家都好重視情調,會一起聽下歌、跳下舞,增進感情。
有人話成家後的男人會原形畢露,唔似拍拖時咁浪漫。阿Tim則剛剛相反,婚後愈來愈會玩浪漫,好像拍拖時只識送垃圾桶給Rabee'a當生日禮物;但在她剛過去的35歲生日,則精心預備了燭光晚餐和玫瑰花,浪漫指數急升,絕對是好老公的典範!羨慕死人呀!

圖:rabeeay & dearjanetim@instagram
伴侶之間,最重要是互信。Rabee'a拍拖初期好易呷醋,會check對方手機短訊,難得的是阿Tim完全不介意,學識包容和體諒女友。婚後情況來個一百八十度轉變,Rabee’a 笑指老公變得非常痴身,主動向她報告行蹤,完全不用她操心:「全靠我10年來train得佢咁好!」煉成面前這位絕世顧家男。
Rabee'a身材火辣,阿Tim大隻又有肌肉,二人經常在instagram大曬身材,完全不怕另一半被人睇蝕:「咁件衫靚,而佢真係有事業線呀嘛!」言語間感受到阿Tim的自豪;至於Rabee'a玩得更大:「佢剩係show手臂咋!我都想佢show多D!」兩人不單沒有呷醋、管頭管腳,還為另一半感到驕傲,足證這對小夫妻對大家都係信心爆棚。

圖:rabeeay & dearjanetim@instagram
10年來兩人一起瘋狂,一起追夢,手挽手走到今日,實在不易。問到往後10年的家庭目標,阿Tim知道老婆喜歡小孩,會努力奮鬥,讓她安心卸下工作包袱,做個full time mom專心湊B。第一次聽到老公心底話的Rabee'a ,也希望再享受多幾年二人世界,然後組織幸福小家庭,相愛更多、更多個十年。

場地提供:問月酒店
Rabeea's hairstylist: Zap Tang @ Private I
Tim's stylist: Jamie Lee @ Hair
Rabeea's outfit: YEECHOO
Tim's outfit: Dorian Ho Homme

Text_Fanny(Editor's Blog)