跟貴族明星豪嘆馬爾代夫Resort!

撰文: Edith Yuen 於 2018-03-15 01:01 31838 次觀看

第一次以Mrs & Mr身份去旅行，梗係要豪返次。威廉王子同凱特皇妃、碧咸一家以及林志穎入住過嘅馬爾代夫resort，就要成5位數一晚。就算你唔捨得，都可以入嚟睇下有幾豪。

英國威廉王子同凱特皇妃去馬爾代夫度假時，曾入住五星級渡假酒店Cheval Blanc Randheli Maldives‎，成個resort只有46間房間，非常私密。每個房間景觀都一望無際，有私人泳池同無敵海灘，一晚至少要HK$16,000，不過一生人一次，豪返晚，值得嘅。

呢度嘅Spa room都係面向大海，蓋天白雲，景觀一流，喺度享受spa簡直係人生樂事。餐廳及酒吧走時尚簡約風，打開落地玻璃，椰林樹影就喺眼前，絕對係最佳把酒談心之所。

地址：Randheli Island, Noonu Atoll, Republic of Maldives

球星碧咸就同一家大細去過位於北馬累環礁One And Only Reethi Rah Resort。呢度有馬爾代夫「度假村之王」美譽，到埗更有私人遊艇接載，連馬爾地夫政府都評為首屈一指嘅私人度假島嶼。

所有resort都係以獨立别墅設計，設有陽台樓梯步入大海。裝潢以至每項配套都極具奢華，所有服務都好似貴族式款待。查過平均房價，大約HK$13,000起，平過凱特皇妃嗰間。

林志穎一向都係走在潮流尖端，次次都係首批得到最新iphone嘅星級用家。馬爾代夫第一座全水上屋度假村Soneva Jani於2016年頭開幕時，佢就係首批用家。呢度最signature嘅就係水屋附設2層高滑梯，直入印度洋，真係超有快感，林志穎都有留影！

呢個地方360度全方位環視印度洋，頂級別墅有私人泳池同埋一間可通向潟湖嘅露天浴室。最特別係主臥室屋頂有伸縮功能，夜晚接掣就可以見到滿天星星，好浪漫呀！不過咁正嘅resort要成HK$25,000一晚，唔知你捨唔捨得呢？

Text_Fanny（Editor's Blog）