沖繩 留下婚姻路上每個甜蜜足跡
14 March,2018
Click Thumbnails to Enlarge

愛,係一個不斷延伸嘅過程。你同另一半,由相識、相知、求婚、結婚、度蜜月到結婚紀念日,每一個里程碑,都值得揀一個特別嘅地方,同另一半好好慶祝。沖繩,熱情又浪漫,係見證你哋每個sweet moment 嘅最佳地點。

求婚 ─ 當一次電影主角
愛情電影裡嘅藍天白雲、清澈海灘,現實中嘅沖繩就搵得到。充滿電影感嘅靚景,令求婚成功率大增,當地酒店更會配合求婚大作戰,悉心佈置私人沙灘,實現新人理想嘅求婚畫面,求婚一定成功!冬季去沖繩求婚,既溫暖又有氣氛,例如沖繩市聖誕燈飾Christmas Fantasy、美國村燈飾等,都係季節限定嘅求婚勝地。

婚禮 ─ 特色海濱教堂林立
沖繩本島同外島,有齊各式各樣嘅海邊教堂:歌德式、希臘式、地中海風情、圓頂教堂等……新人舉行婚禮時,感受碧綠海洋、燦爛陽光環抱嘅溫馨感覺。婚禮之後,享用以地道食材烹調嘅婚宴,令人回味無窮。喺沖繩合法登記結婚,香港一樣有法律效力,新人唔使再返香港補辦手續。

蜜月 ─ 浪漫與悠閒之間
度蜜月係新人最重要嘅甜蜜時光,沖繩嘅南國風情,令你完全放下生活壓力,盡情享受浪漫與悠閒之旅:國際通盡情購物、恩納村尋找隱世海灘、亞洲最大嘅美麗海海洋博公園、被列入世界文化遺產嘅古代城跡。近年流行嘅沖繩外島熱,宮古島、久米島同石垣島等蜜月天堂,景色獨特,可以以相宜價錢締造難忘蜜月之旅。

Vow Renewal ─ 再次許下愛的承諾
婚姻似釀酒,感情隨住時間一點一滴咁累積,令愛芳香醇厚。婚後5年、10年後,直至白頭,同伴侶再踏沖繩,體驗歐美盛行嘅Vow Renewal,再次確認雙方「愛的誓言」。呢次旅程,可能會帶埋你嘅兒女、甚至孫仔孫女,見證你倆永不褪色嘅婚盟。

更多沖繩婚禮形式、教堂資料、愛情故事及婚姻紀念日等資訊,
立即瀏覽 >

婚姻每個里程碑,你都可以喺沖繩留下美滿回憶。有關沖繩海外婚禮服務,可向
有關商戶查詢 >