朋友客串 VS 專業司儀,「最佳配角」點樣揀?
04 July,2018
Click Thumbnails to Enlarge

如果話一對新人係婚禮全場嘅主角,咁話婚禮MC係「最佳配角」就一啲都冇錯!因為佢哋不單只係搞下氣氛咁簡單,仲控制住整個婚禮嘅流程、串連婚禮每一個環節,同每一Part嘅負責人都要協調溝通,互相配合,確保婚禮順利進行。

MC達人Agnes Leung從事司儀行業7年,精通粵英普閩四語,經常為婚宴、企業、商場等各類團體或慈善機構擔任司儀,平時仲會開班授徒。今日就等呢位「老行尊」話你知,「最佳配角」應該點樣揀啦!

編 = 生活易編輯

A = Agnes Leung

編:坊間有人會選擇邀請朋友客串做MC,究竟好唔好?
A:好多新人都會認為搵朋友做MC既有親切感,又可以慳番D錢,唔使額外俾錢請專業MC,但此舉亦可能得不償失,因為婚禮上要同時照顧來賓同親友,講求禮節周到、招呼有序,要令所有人稱心滿意絕對唔容易。非專業司儀隨時會出錯,令婚禮有瑕疵,甚至會令新人留下遺憾。

編:你有冇試過目睹朋友客串做司儀嘅災難場面?
A:當然有,亦聽過唔少。由親友客串做司儀,雖然熟悉一對新人,但他們未必能照顧全部來賓及了解新人和雙方家人的需要,經常會只顧「自High」,而忽略主人家的感受。最容易出現尷尬情況、詞窮、口誤甚至dead air,或者唔覺意將婚宴變成自己嘅talk show,拿捏唔好會影響到整個婚宴氣氛,同時朋友唔熟悉流程步驟,未必可以仔細連繫每個細節。所以除非你嘅朋友具相當婚宴主持經驗,否則請專業婚禮司儀係最穩妥嘅做法。

編:同樣都係MC,但有平有貴,應該點揀呢?
A:從業5年以上屬於資深司儀,經驗豐富,對流程規劃,氣氛掌控都可以用專業技巧應對,價格雖然相對高,但勝在能令新人安心享受整個婚宴過程;新入行一兩年嘅司儀,或者Part-time司儀欠缺實踐經驗同情景參考,質素比較參差,但價格較相宜。雖然價錢唔一定越貴越好,但亦唔好一味貪平,最重要視乎自己需要,搵一個合適人選擔任婚宴司儀。

編:專業司儀都分好多種類型,有乜需要注意?
A:每位司儀都有其獨特風格、配合度以及擅長領域。如果MC接觸不同類型嘅場合越多,臨場反應通常會越好,主持經驗多啲,係重要時刻絕對可以憑著豐富嘅經驗及技巧,輕鬆拆解各種突發情況;甚至開show前已洞察到有咩地方要特別注意,預先提點新人。

編:司儀係婚禮當中通常需要做啲乜?
A:如果朋友客串做MC主要會喺新人進場前上台講幾句助慶,但專業婚禮司儀就會為新人做多好多嘢。我哋會喺婚宴開始前與各個單位工作人員溝通協調,包括場地、燈光、音樂、拍攝、上菜、敬茶、合照等。而在婚宴過程中,我哋會一方面帶領著整個婚禮嘅進程,有條理地串連婚宴中的每個環節,營造溫馨歡樂嘅氣氛,帶領著新人及賓客享受婚宴過程;而另一方面,我哋會緊密地留意現場情况,隨機應變,控制氣氛。確保婚宴能配合新人及家人的需要,務求令新人可以喺婚宴當晚好好感受圓滿人生時刻,同時令雙方家人及親朋好友留下美好而難忘的回憶。

編:關於司儀選擇,仲有乜建議提供俾各位新人?
A:除咗考慮婚禮要求同個人預算外,建議confirm之前多啲睇下司儀過往主持婚宴嘅影片、個人網頁、社交網站評價同埋工作紀錄……呢啲都是比較信得過嘅參考方式。搵專業司儀買嘅唔係時間咁簡單,而是其經驗同技巧。最適合你嘅司儀,就是最好嘅司儀!

關於Agnes Leung(梁雯婷):
Association of CPWP - 專業婚禮統籌師認可
香港婚宴管理及形象設計學院 - 婚禮統籌及宴會管理文憑認證
香港理工大學專上學院 & 香港金融管理學院 - 司儀演講課程導師

聯絡及服務查詢:
電話:(852) 9809 7489
電郵:agnesleungmt@gmail.com
網址:http://www.mcagnesleung.com/
Facebook@MCAgnesLeung

即睇更多Agnes Leung的工作實況

特約資訊