例子1：極端天氣 正所謂天氣不似預期，邊個會諗到10月都打8號風球同掛黑雨？婚禮或婚宴前3個鐘頭內，天文台發出8號或以上颱風訊號、或黑色暴雨警告訊號，令新人同賓客去唔到有關場地，而要取消或重新安排有關活動，婚禮保險可賠償新人無法追討嘅開支。 例子2：已訂場地執笠 準新人俾咗酒席訂金後，最驚就係婚宴場地突然執笠，攞唔返訂金之餘，又驚搵唔切其他地方擺酒。如婚禮或婚宴場地破產/清盤，令新人要取消或重辦婚禮活動，可獲最高賠償額HK$100,000。 例子3：婚禮攝影師no show 攝影師都係人，會因病或受傷無法履行婚攝合約。只要有醫生合法證明，新人可獲賠償無法追討嘅開支，以及另找婚禮攝影嘅額外費用，最高賠償額為HK$20,000。 例子4：重要財物失竊或損毀 婚宴人來人往，無論係新人大意遺失，定係有人手腳唔乾淨，唔見咗貴重財物，例如婚嫁手飾。新人一定要喺24小時內報警，並將已填妥嘅賠償申報表，喺事發30日內遞交保險公司，就可以申請索償。如果新人租借嘅婚禮服飾損毁，只要屬於保單保障範圍內，亦都可以獲得賠償。