如何撰寫愛的宣言？｜婚禮誓詞必備元素！「愛的宣言」6大風格Sample示範教你寫出令伴侶及全場滿意的結婚誓言

撰文: Elize Chan 於 2025-12-01 10:36 264672 次觀看

想撰寫一篇令人感動又獨特的愛的宣言／婚禮誓詞？不少新郎哥甚至到婚禮前夕都仍然未能落筆，緊張指數比當初追求、示愛、求婚都更難開口，到底應該走搞笑、肉麻還是催淚、感動的路線，愛的宣言又需要包含什麼必備元素？

今次編輯就用盡畢生寫作的經驗，務求拯救一眾「啞口無言」的準新郎，從「愛的宣言」結構、內容靈感，再創作出6種不同風格的「愛的宣言」範本，只要稍微加入你們的愛情小故事即可派上用場，寫出適合自己最簡單而真誠的愛的宣言，感動另一半的同時，亦令在場賓客們都滿意的愛情承諾，事不宜遲，即刻動筆啦！

【如何撰寫愛的宣言？】

想寫好婚禮「愛的宣言」，可以跟住以下小貼士：
1. 回憶點滴：分享你哋相識、相知的片段，或者某些令你難忘的時刻。
2. 發自內心講愛意：用最簡單直接的語言，講出你點愛對方。
3. 講承諾：表達你對將來的期望同承諾，例如「無論順境逆境都會陪你」。
4. 加入個人特色：可放些小趣事或獨有默契令誓詞更專屬。
5. 結尾感性：以一句簡潔真摯說話作結，呼應你們的愛情主題。

最重要係真誠自然，以下有6篇不同風格的「愛的宣言」，每一篇都可以根據你嘅故事再作個人化調整！

【「愛的宣言」6大風格Sample示範】

愛的宣言／婚禮誓詞｜＃1 浪漫深情版

你出現之前，我相信緣分，你出現之後，我相信奇蹟。你是我世界裡最璀璨的光芒，治癒內心每一點脆弱。和你一起走過的每段日子，開心、爭吵、和好、笑聲、淚水，全部都變得特別而珍貴。我想用一生時間去學習如何愛你，守護你，不只在今天，更在往後每個日日夜夜。未來的路可能不易走，但只要牽著你的手，我相信任何困難都可以一齊渡過。謝謝你教懂我愛和被愛，從此以後，我的世界只想屬於你一個人。請允許我，用一生去陪伴你、疼愛你，創造屬於我們的幸福奇蹟。

愛的宣言／婚禮誓詞｜＃2 溫馨家庭版

你唔單止係我嘅愛人，更係我最親密嘅家人、最信任嘅朋友。我哋由朋友到戀人，再決定踏入家庭，每一個階段都多謝你包容同支持。你嘅細心、耐性、溫柔令我倍感溫暖，有你嘅日子總係咁舒服自在。未來不論遇到咩挑戰，我都願意同你一齊面對。一齊煮飯、一齊旅行、一齊簡單過活，已經係我最渴望嘅幸福。多謝你願意同我建立屬於我哋嘅小家庭，我承諾用餘下人生守護你同我哋嘅家，做你永遠嘅避風港。

愛的宣言／婚禮誓詞｜＃3 簡約真誠版

冇華麗嘅字句，只有一句好簡單嘅承諾——我會一直愛你，照顧你，陪你行完剩下嘅人生路。見到你開心我就開心，你唔開心我就想盡辦法逗你笑。以後不論順境逆境，健康疾病，我都唔會缺席。我愛你，今日如此，將來亦都如此，直到永遠。

愛的宣言／婚禮誓詞｜＃4 幽默輕鬆版

我承認，我份人有時好懶、有時仲做咗好多好蠢嘅事，但你總係以超大嘅包容同埋幽默拯救返我。從今日起，你開心時我開心，你喊就幫你遞紙巾，你嬲同你一齊炆，你忙陪你捱眼瞓，有好嘢實預妳一份，仲會為你搞氣氛，買衫買袋唔過問，埋單由我俾現金，無論一餸定幾味，好唔好味都歡喜，孝順我哋父母親，對妳坦白句句真，第時就算八十幾，日日都講我愛妳！感謝你令我生活變得更歡樂又瘋癲。我承諾，咩事都一齊做，就算我老咗都會同你手拖手周圍癲，愛你一世。

愛的宣言／婚禮誓詞｜＃5 勵志型

人生未必永遠順利，但只要你係我身邊，我就充滿勇氣。你支持我追夢、安慰我失落、陪我分享一切成就和失敗。有你，我感受到力量。我承諾，用全副心機去愛你、守護你，做你最堅實既後盾。未來遇到困難，我地一齊撐過，永不放棄！

愛的宣言／婚禮誓詞｜＃6 個人化感動版

第一次遇見你時，無諗過原來你會成為我人生最重要的人。你嘅每一個微笑、鼓勵、甚至鬧我一餐，都令我更加愛上你。你鍾意飲黑咖啡，我就學整拉花；你怕蟲，我就負責掃晒全屋。這些日常細節，慢慢累積成我最安心、最幸福的感覺。由今日起，我唔單止係你嘅愛人，更承諾成為你一生的依靠。多謝你選擇我，未來一定會繼續攜手，一齊寫好屬於我地的愛情故事。

想寫好婚禮「愛的宣言」最重要是真誠、自然，由兩人相識、相愛到步入入生下一個階段，必定經歷過無數個難忘時刻，藉此講出心底裡的愛意，並表達你對彼此將來的期望及承諾，完結前緊記要答謝一直愛護、照顧另一半的家人朋友，再祝願在場的賓客都能夠享受婚禮當日每個幸福浪漫的時刻，這便是最完美的婚禮誓詞啦！

【延伸閱讀】
- 【愛的宣言Sample】集結愛情電影劇集完美示範！搞笑肉麻、催淚感動Template任你揀
- 婚禮歌曲|120+首韓日台港婚禮必備結婚歌曲清單|附歌曲連結、持續更新