【公屋大改造】何文田愛民村360呎改造成一家5口居所!北歐風兩房設計安樂窩

【公屋大改造】何文田愛民村360呎改造成一家5口居所!北歐風兩房設計安樂窩
唔捨得同父母分開嘅新人,婚後都會考慮繼續同住。但住咗咁多年,依家多個人搬入嚟,又點止多雙筷咁簡單?要將屋企大翻新,聽落好似好麻煩!

今次介紹嘅單位位於愛民村,家庭成員有成5個咁多,但屋企面積只有約360呎,唯有睇睇設計師有咩好橋先。
設計師主要從傢俬及顏色兩方面入手,將屋企大改造。為咗滿足屋主鍾意北歐風嘅願望,設計師選用木造傢俬及灰藍色signature wall 為主題,由門口位開始延伸至客飯廳,都加入好多間隔櫃及牆身櫃儲物,所以單位睇落一啲都唔擠迫。
門口有一個闊落嘅玄關位,客人一入屋就留下好印象。屋主擺咗個入型入格嘅木製梯形椅子連鏡,方便換鞋及整理儀容。
呢個屋企住咗5個人,所以食飯空間一定要夠大。設計師預留咗80呎做飯廳,可以放一張6人大餐枱,再多啲客人嚟home visit 時又可以變身8人枱。飯枱旁邊有一大幅儲物櫃,仲特別設計咗個小牆身櫃,可擺放小擺設及盆栽,開埋燈就營造出溫暖氛圍。
由於單位天花原有3條橫樑,為客廳減輕壓迫感,設計師以木條子作裝飾,屋企即刻好有style! 屋主又購入一張靈活多變嘅梳化床,日間可以擺返個茶几,夜晚打開就變成雙人床。
單位原為兩房設計,設計師保留原形,各擺放咗組合床,加埋客廳嘅梳化床,一定夠全家瞓。
廚房雖小,但屋主精心揀選咗小型電器,所以稱得上五臟俱全;廁所裝潢亦簡單不花巧。咁warm嘅北歐風dream house裝修連傢俬大約花咗36萬,價錢都算合理!

資料提供:公屋裝修易

Text_Fanny