我地要先為眾多位兄弟戴上雙管絲襪（易於戴上及扯甩，P.S.單管太逼，基本上玩唔到），然後姊妹們將所有絲襪紮埋一齊，而兄弟唔可以用手，只可用頸力扯甩對絲襪，上演「絲襪角力大賽」，各兄弟不斷fing頭，好鬼搞笑，當扯剩最後兩位“同氣連枝”的兄弟，需要合作一齊在指定範圍內搵麻雀兩只（一只「一索」同一只「南」，喻意一索得”男”），搵麻雀時兩人互相拉扯，好似兩個傻賊打劫咁，無論現場定晚宴時播放都會好好笑，搵到麻雀後，最後兩人繼續用頸力扯甩對絲襪，而最尾的一位可以請另一名兄弟用手幫佢捉住其中一端，自己好似傻仔咁掙扎到用頸扯甩絲襪為止。

道具：非常簡單。(1)雙管絲襪（若干對，兄弟數目）、(2)麻雀兩只（一只「一索」同一只「南」）

趣味：玩法簡單，視覺效果豐富。淨笠絲襪落頭已經好搞笑，仲要上演「絲襪角力」，扯得最慢的兩位兄弟又要扮賊搵麻雀，增加刺激感，無論現場定晚宴時播放，都會令全場人捧腹大笑。

寓意：甜甜襪襪（蜜蜜）、一索得南（男）【上年年尾玩過呢個遊戲的一對新人朋友，剛添了個男丁，實在好好意頭呢^_^】