婚禮災難|一人一個結婚之匪夷所思|鄭中基召集!精選20個網友分享的婚禮爆笑場面

data_article_detail.is_new_Slide_show = True

結婚是人生大事,當然希望一切順利,務求留下一個完美的回憶,不過婚禮常常會發生不可預計的意外。近日鄭中基就在社交平台招募網友分享婚禮上的爆笑所見所聞,話題隨即引來熱烈討論,截自今日經已有二千多個分享,到底有什麼婚禮爆笑場面最多點讚?希望準新人有個心理準備的同時,祈求大家將來也不會遇到啦!

(圖片來源:《低俗喜劇》劇照)

鄭中基在社交平台發文:「近排見好多人結婚,諗起之前睇過有啲MC講錯嘢,定係奶奶外母著錯衫,其實搞結婚都應該幾多大鑊嘢,睇吓你哋又有冇啲咩故事開心share啦!」,他更不忘提到詹瑞文在《我要做Model》中最經典的電影情節「即場拆人情」。到底網友分享了哪些比即場拆人情更大鑊的故事?
(圖片來源:《我要做Model》截圖)

婚禮災難|一人一個結婚之匪夷所思|婚禮司儀篇


1. 「MC將下一個星期同一個場地嘅新人戀愛故事當咗係我嘅戀愛故事,全場人聽完都唔知佢講緊邊個....」
(圖片來源:《今生是第一次》劇照)

2. 「MC:『上乳豬之前大家不如一齊睇下一對新人生前嘅片段』」
(圖片來源:《人約離婚後》劇照)

3. 「去到上乳豬,MC又話『依家上乳豬,大家一齊為我哋壯烈犧牲嘅乳豬BB鼓掌!』」
(圖片來源:《人約離婚後》劇照)

4. 「MC話新娘皮膚好白,新郎皮膚好黑,婚禮上MC話一對新人一黑一白,好似黑白無常咁襯。。。結果全場靜晒」
5. 阿BOB就分享了一次婚禮司儀的經歷,「七八年前試過有一次,個外父飲大咗,去到婚宴尾段突然上台攞咗我支咪,然後指住台下面個新郎哥講:『你呀,記住對我個囡好啲呀,如果唔係,我屌爆你老母㗎!』之後全場靜晒,最正嘅係,新郎嗰個阿媽,即係奶奶,都坐咗喺主家席嗰度食緊個伊麵,然後我就攞返支咪話:『外父,放心啦,為咗保護屋企人,我相信佢一定會對你個囡好好㗎,同埋奶奶都70幾歲啦,不如就咁算啦!』跟住全場大笑兼拍手掌,最緊要嘅係奶奶都企左起身拍晒手!」
(圖片來源:bob.lamshingbun@FACEBOOK)

婚禮災難|一人一個結婚之匪夷所思|新人篇


6. 新娘子喺台上面同奶奶講「我咁多個奶奶裏面最好嗰個就係妳⋯⋯」
(圖片來源:《燦爛的外母》劇照)

7. 新郎喺未開席前就已經飲醉咗,四圍喊住同人講「我唔想結婚呀」
8. 新郎帶埋班兄弟上台唱「年少無知」,唱到「如果 命運能選擇」時眼濕濕好感動,新娘塊面黑左。。。
(圖片來源:《天與地》截圖)

9. 試過有friend結婚,証完婚交換完戒指諗住抛花球,點知個新娘一抛抛埋隻戒指出去,搞到要所有賓客一齊揾,可惜最後都係揾唔到。
(圖片來源:tinyeewong@INSTAGRAM)

10. 試過一對新人預定晚上8點場地證婚,但7點55分律師都未到,新郎打電話俾律師先發現,原來當初WhatsApp問律師有無期,律師答有,新郎誤會咁就等如book咗律師(事實係要俾deposit先會hold期,咁嘅情況當然無book啦)結果,當晚係無律師證婚,為咗唔好穿崩,新郎揾酒店經理扮律師,MC主持,證婚儀式做足,只係簽名簽落張A4紙度,台下賓客唔知拍哂手掌,而知情嘅兄弟姊妹、新郎勁尷尬,新娘、四大長老黑晒面,據聞事後佢哋去律師樓補簽正式文件。
(圖片來源:misselvani@INSTAGRAM)

婚禮災難|一人一個結婚之匪夷所思|長輩篇


11. 奶奶話要向先人敬酒,奠落地,搞到台上嘅地毯濕晒。
(圖片來源:《燦爛的外母》劇照)

12. 長輩一朝早見到親戚big day,全隊攝影師的制服係黑色,話唔吉利,要求佢地立即落樓去買過啲大紅大紫色的恤衫換
(圖片來源:《香港愛情故事》劇照)

13. 其中一個上台致辭嘅長輩(德高望重的), 好誠懇咁講到婚姻之中一定會有矛盾嘅,然後語重心長咁講:「希望在座各位親戚好友可以成為新人嘅潤滑劑。 」
(圖片來源:《燦爛的外母》劇照)

14. 結婚嗰日我媽條奶奶裙由一條長裙變咗條短裙,因為佢飲大咗喺度嗌熱,就唔知喺邊度搵到把鉸剪剪短咗條裙
(圖片來源:《我的超豪男友》劇照)

15. 見過新娘掉個花球比個奶奶接實
(圖片來源:wongtsuiyu@INSTAGRAM)

婚禮災難|一人一個結婚之匪夷所思|賓客篇


16. 前度衝上台拎咪話「以前你話娶我時點點點,現在你都要咁對你老婆,唔好再叫人落仔,有就好生啦!」全場靜左
(圖片來源:《人約離婚後》劇照)

17. 成班同學出席一位男同學婚禮,到最尾其中一個同學飲醉酒,捉住新郎哥個老豆嗌親家……
(圖片來源:《香港愛情故事》劇照)

18. 新人進場時,有個兄弟側手翻跟住喺新人後面狂轉一齊進場,以為係表演項目之一,後尾先知道佢未開席已飲醉咗
(圖片來源:《太陽的後裔》劇照)

19. 三個兄弟飲大咗,其中一個醉到不醒人士,直接倒地,另外兩個在旁大喊叫他「唔好死呀!唔好死呀!」不久有救護員到埸,原來佢哋醉到以為兄弟不醒人士中酒精毒死咗,所以報警
(圖片來源:《太陽的後裔》劇照)

20. 賓客飲醉酒踢爆廁所咸水喉,然後有個「海嘯」由廁所湧出大廳
(圖片來源:《職業特工隊6》截圖)