主頁 > 婚禮籌備

【真實個案分享】婚禮小意外點拆解？

撰文: Fanny Ngan 於 2018-01-30 08:22 22285 次觀看

data_article_detail.is_new_Slide_show = False

結婚已經plan好晒，仲要plan咗好耐，應該唔會有咩意外喇卦。講明意外，罕見到發現炸彈要封路，擺酒受阻，常見到打風、被困升降機、花車死火，甚至march in無燈等等意外，唔使拍戲，絕對可能、而且真係會喺你婚禮日發生！講臨場應變，不如事先有準備，睇睇專家分享5個真實個案及當時點拆招，學嘢啦！

真實個案1：八號風球！入唔到門點算好？

掛八號風球時，大部分婚禮都會繼續進行。不過，天氣太差，亦多咗變卦。「香港國際大妗姐協會」創會主席歐惠芳就話，試過因為8號風球，新娘唔可以按正常程序入門：「嗰陣喺半島酒店出門，但男家住喺偏遠地區，風大雨大下，難趕到男家入門，老爺奶奶又趕唔切出市區。」真愛無懼風雨，變通一下，無話唔得嘅：「即刻轉plan B，改為晚上在婚宴場地入門，新人入場時同時向老爺奶奶敬茶，順利執生。」

小提醒：大家預訂攝影服務、佈置及場地時，都要問清楚惡劣天氣嘅應變方法，例如要唔要額外收費等。如果可行嘅話，book出門酒店可以跟男家住址近一啲，或者book多間套房作入門儀式，縮短交通時間，避免錯過吉時。

真實個案2：老爺車死火　新娘爆喊！

有新人book咗架老爺車，中途死火，兄弟團換車，以為搞掂啦，點知新娘情緒hold唔住大爆發，不停埋怨自己點解要揀老爺車，搞到出意外，仲要喊到收唔到聲。情緒嘅嘢有時連當時人都控制唔到，反而需要其他人按STOP掣！好似歐惠芳當場就拎出一塊鏡，向新娘嚴肅訓話：「你喊啦，喊到個妝花曬，MUA可以補到妝，但眼紅問題就無人幫到！」結果，新娘即刻乖乖收聲。

小提醒：萬一婚禮上遇到不如意事，深呼吸，等自己冷靜下，萬事總有解決方法。記住，婚禮，係一生人嘅回憶，唔好因為一時鬧情緒而令自己留下遺憾！

真實個案3: March in無燈！新人點進場？

人為出錯，又可以點算？婚禮司儀Cuz遇過新人在全場暗燈進場時，follow spot 壞咗，酒樓職員又無開燈。為免破壞march in，佢當時咁樣做：「我叫現場賓客開着手提電話嘅電筒，一齊製造氣氛。喺呢個時候再同職員講，叫佢哋慢慢開燈，咁就冇人發現有問題。」

真實個案4:播片無聲變默劇全靠MC一個指令

仲有一次，Cuz話播成長片段嘅時候，有畫面但無聲，試咗兩次，執生都執咗2次，結果都係一樣。好彩當日有live Band，到第三次時我叫佢哋即刻彈 you raise me up，然後同現場賓客講：「我想效果特別啲，試吓用現場音樂去伴奏，希望大家會鍾意。」

小提醒：通常場地交場時間為下午3時起，新人到場後應請wedding planner或兄弟姊妹即時與職員商討流程及綵排，試播音樂、影片及燈光操作，以防臨時出事。

真實個案5: 從此被困？雙雙困升降機走唔甩！唔係電視劇，真正被困升降機意外總係出乎意料。歐惠芳當時與攝影師及一對新人就困咗喺升降機內，經驗豐富嘅佢立即叫外面嘅兄弟報警，以免誤吉時，為咗唔影響新人心情，佢又要執生安慰佢哋：「上天都要你哋呢世困埋一齊，永不分離！」又同新人諗計加插一場一世難忘嘅婚禮花絮：「當消防員準備撬開門一刻，外面嘅攝影師準備拍低大隻佬英勇場面，兄弟一齊大叫3、2、1，一開門就見到新人甜蜜擁吻嘅畫面。」歐惠芳再講：「開lift開好運，出lift遇貴人，喜神、財神一齊入男家。」新人即刻安心曬！

【真實個案分享】婚禮小意外點拆解？

想緊貼更多結婚資訊？