婚享同學會
婚禮商戶指南600萬天價裝修費！設計師帶你參觀本地豪宅
data_article_detail.is_new_Slide_show = False
600萬對好多香港人嚟講都係一個遙不可及嘅數字。就算有呢筆錢，你都未必買到心水樓盤。但亦有人甘願花曬喺裝修費上。今次由DIC設計情報中心設計師帶你參觀新翠山莊，睇下600萬裝修費貴喺邊！
新翠山莊呢個複式豪宅，一共有三層半，分別為客飯廳、睡房、雜物房及天台。單位內有3間房、1間工人房、車房及花園，實用面積近1500呎。
今次嘅裝潢風格以簡約明亮為主，同想像中嘅「豪宅」概念有出入。原來翻新前嘅環境正正以深色為主，所以今次想有新鮮感。設計師話今次可算是大翻新，由外牆髹油、水電煤、防漏工程、花園以至內裡每個角落的裝潢連傢俬，統統改頭換面。仲有跟住落嚟介紹嘅high tech設計，600萬走唔甩。
其中一間兒童睡房，天花板裝有星空燈，原來係用光纖製成，設計師在天花板打造幾百個不同大小的燈槽，仲可以玩變色，夠晒吸睛。當然手工同人工費絕對唔少，如果壞咗都要花一大筆維修。
全屋所有窗簾都係電動搖控操作，採用高級優質品牌，遮光功能一流，又唔洗浪費人力操控！
有錢人家屋企一定有啲貴重財物，一個設有密碼鎖嘅雜物房非常重要。地庫被設計師打造成雜物房，空間都唔細，收納量大。留意返，單位內都有安裝閉路電視，加埋監控，做足保安工夫。
呢個極大嘅廚房，相信係好多人妻心目中理想小天地。一整排廚櫃原來設有不同間隔及桌子，實用性大增。
豪宅電箱比一般家庭單位大得多，設計師就用其中一格完美隱藏電箱，夠晒得體。唔講唔知，喺廚房隔離有間工人房，空間唔算大，屋主仲將部分廚櫃隱身設計成衣櫃，順勢擴大工人房面積，係咪好貼心呢？
大家第一眼係咪俾客廳嘅水晶燈吸引住呢？喺咁大間屋，水晶燈雖美但光線唔可以觸及每一個角落，有見及此設計師特意加上燈槽，燈光柔和亦能增強光線。設計師仲提醒大家，即使單位細小都可以用燈槽，唔怕光線太集中！
屋主育有2個小朋友，大量玩具收埋喺邊？原來客廳電視機後都隱身咗個玩具房，平時玩完就可以放曬入去，唔洗專登去地庫，方便又唔礙眼，更可放大客廳空間感，一舉兩得。
設計師話，負責豪宅裝修，每一步都要諗清諗楚，一旦漏咗啲電線、網絡線路，又要重新舖過，浪費時間同人力。咁大間屋嘅設計以至裝修及入伙，都用咗1年時間架！
Text_Fanny（Editor's Blog）
Text_Fanny（Editor's Blog）
