婚後重遊 更多玩法

沖繩四季都啱去，冬春有特價機票同酒店加持，去食嘢、行街、睇櫻花啱晒。夏秋兩季當然唔少得水上活動、小島游，全部都係度蜜月、結婚週年紀念好選擇。

蜜月──沖繩尋秘景

講明係蜜月之旅，梗係租間海邊resort過二人世界，再租車四周圍搵沙灘，發掘前所未見嘅秘景。玩遍沖繩本島，近年興周邊小島遊，香港現有直航航班飛往石垣島，亦可從沖繩本島轉乘內陸機或渡輪去宮古島同久米島，留喺豪華resort內，吹下海風、划艇、浮潛、歎美食，就係最好嘅活動。

婚誓儀式──再歷婚盟的浪漫

歐美國家盛行「婚誓儀式」(Vow Renewal)，除咗銀禧、金禧等特別日子外，亦可以喺特別日子舉行儀式，再經歷訂下婚盟嘅浪漫同感動。喺呢個時候，你同honey甚至帶埋小朋友，一家人遊沖繩都好方便。喺南部那霸市，搭單軌鐵路就去到首里城、國際通等主要景點；要到北部名護市，乘搭高速巴士，兩個鐘就去到美麗海水族館，一家大細都啱玩。