「家燕奶奶」獨家專訪！點評未來新抱！
撰文: Fanny Ngan 於 2017-12-04 11:08
106541 次觀看
data_article_detail.is_new_Slide_show = False
薛家燕囝囝Jackson求婚成功，佢終於有新抱茶飲，就嚟做「真．奶奶」。雖然佢做戲經常做奶奶，但喺現實中要做準奶奶，心情難免緊張。呢日佢就同囝囝及準新抱Zoe一齊接受我哋專訪，分享籌備婚禮過程，仲即場點評呢位未來新抱！
![「家燕奶奶」獨家專訪！點評未來新抱！]()
自囝囝Jackson求婚成功後，家燕姐已著手籌備婚禮，擺酒逾百圍，所以成年前已開始準備：「好彩Jackson畢業後第一份工就喺生活易做，對婚禮呢行比較熟，好多事都由佢安排。」佢又大讚準新抱Zoe好尊重佢：「連去外國影婚紗相著邊套衫，都會send相問我意見！」
![「家燕奶奶」獨家專訪！點評未來新抱！]()
家燕姐一出場，一定成為全場焦點，為此囝囝都怕媽媽會喺婚禮上太搶鏡，預早提點佢。家燕姐笑稱：「佢同我講，結婚當日唔好著到好似登基咁。」呢個奶奶認真識做。
![「家燕奶奶」獨家專訪！點評未來新抱！]()
家燕姐含辛茹苦湊大3個囝囡，囝囝終於要成家立室，多少都有啲唔捨得。身為孝順仔嘅Jackson為咗照顧媽媽，婚後會住喺媽媽附近，得閒返屋企聚天倫之樂。家燕姐知道囝囝有呢個決定都話「好安樂！」。
![「家燕奶奶」獨家專訪！點評未來新抱！]()
俗語話：「為人新抱甚艱難」，Zoe都話聽過身邊嘅人妻朋友大呻婆媳糾紛，但就慶幸自己同未來奶奶相處得好好。家燕姐對Zoe亦滿意：「Zoe好賢良淑德，煲湯好叻，喺我拍劇要捱更抵夜時，佢會煲一壺交俾Jackson轉交俾我，好體貼，娶到Zoe， 絕對係Jackson嘅福氣。」媽媽同未婚妻嘅廚藝都咁了得，Jackson覺得邊個廚藝叻啲？佢好聰明咁話：「其實我自己煮嘢食都好好味…煮麵！」男士們下次被問同一問題，記得要學佢呢招喇。
![「家燕奶奶」獨家專訪！點評未來新抱！]()
榮升奶奶後，家燕媽媽更想做「家燕嫲嫲」。Jackson就話想過返兩年二人世界先，再生返2個B俾媽媽享兒孫福。家燕姐一人湊大3個囝囡，對兒童教育又咁有心得，將來都想幫手湊孫，Zoe都非常樂意奶奶幫輕下：「好放心（交俾奶奶湊），但就想佢玩孫多啲，唔洗咁辛苦！」
![「家燕奶奶」獨家專訪！點評未來新抱！]()
家燕姐又即場囑咐一對新人要互相溝通、多啲諒解：「囝囝要做個負責任的男人，愛錫太太。但鬧交時唔一定要聽晒老婆話，如果覺得自己無錯，就去洗個面，退一步海闊天空，夫妻床頭打交床尾和。」
![「家燕奶奶」獨家專訪！點評未來新抱！]()
Zoe又多謝未來奶奶：「多謝你教咗個咁乖又咁錫我嘅囝囝，又教識我好多人生道理及待人處事的態度，真係好感恩。」家燕姐聽到都好安慰有個好新抱，囝囝娶到Zoe絕對係佢嘅福氣添！
Text_Fanny
（Editor's Blog）
婚享同學會
婚禮商戶指南
