主頁 > 婚禮籌備 > Real Wedding

林奕匡與老婆：愛情路上的高山低谷

撰文: Edith Yuen 於 2018-02-23 01:48 103981 次觀看

data_article_detail.is_new_Slide_show = False

「每個成功男人背後，都有個女人支持。」歌手林奕匡(Phil)背後，就有個相戀10年嘅好老婆李靄璣(Rikko)，由出道至今一直不離不棄，陪佢走過人生低潮，見證音樂事業攀上高峰。

圖：Rikko/IG

事業低潮感情亮紅燈
Phil同Rikko一齊10年，高山低谷總會遇到。
2013年，阿Phil喺音樂事業遇上低谷，感到迷茫，連帶感情亦受影響：「男仔話雖事業為重，但要佢等我一世絕對唔得，我好想俾到幸福佢，但我都一無所有。佢無理由要為咗我呢個咩都冇嘅人花咁多年時間。」當時Phil超down，成間屋都係負面氣氛，Rikko覺得佢個人太愁，咁樣落去唔得，決定出走幾日，俾D空間大家雙方思考吓。

圖：Rikko & Phil/IG

走出愛情低谷全靠一首歌
Rikko出走第一日，Phil send咗封email俾佢，裡面有Adele嘅歌曲”don’t you remember”，意思係會留返俾啲空間俾佢，希望佢抖抖氣，然後會返嚟佢身邊。

Gave you the space so you could breathe,
I kept my distance so you would be free,
And hoped that you'd find the missing piece
To bring you back to me.

當時Phil心諗：「就算你返到嚟唔想同我一齊，我都會接受，因為我想你開心。」
分開，反而更愛你。有咁體貼嘅男朋友，Rikko更加體會Phil對佢嘅重要性：「我知道就算佢咩嘢都冇，佢都會將當時擁有的全部俾晒你。」於是，Rikko決定繼續支持Phil，仲話：「如果下張專輯都唔成功，我哋可以一齊返加拿大重新開始，我可以同你一齊捱！」呢番話，令兩人大喊一場，但亦令Phil放低好多壓力，最後成功走出低谷。

圖：Phil/IG

給你最好的！
Phil 同Rikko經歷咁多，終於拉埋天窗。家務分工亦好隨意。相愛難，要相處更難。共同生活，有好多嘢比起拍拖時需要更大嘅愛同體諒去支持。不過Rikko就好冧咁話：「辛苦啲嘅工作例如洗廁所、刷浴缸、廚房清潔都由Phil負責，佢會好主動幫手！」

每逢大時大節，Rikko都會收到好多品牌禮物，屋企執極都係咁亂，所以Phil即場向老婆大人承諾：「我嘅目標係要賺多啲錢，換間大屋，可以擺放你所有物品！」好多男士都有微言，話屋企比另一半嘅物品霸晒，但Phil 反而將呢D變成努力嘅目標，真係100分暖男！

圖：Rikko & Phil/IG

Rikko向老爺偷師學廚鎖住男人心！
老公識做，Rikko甜到漏，亦以行動作回應。Phil最愛爸爸煮嘅麻婆豆腐，但爸爸長居溫哥華，好難先食到。Rikko為咗令老公經常食到家嘅味道，專登向老爺拜師學識呢道拿手小菜：「只要我有時間都會為佢煮麻婆豆腐，見到佢開心同食得健康就好滿足！」Phil都超感動，仲大讚老婆廚藝：「我敢講，喺香港，佢所煮嘅麻婆豆腐比任何餐廳都煮得好味！」

圖：Rikko/IG

不要WhatsApp! 愛要action!
訪問當天，小編即場考Phil 同Rikko，，搵搵佢哋對上一次WhatsApp時講過咩情話。點知Rikko話：「其實我哋好少用send message 講呢啲，要講都係喺全世界面前講。Message都係一啲日常對話，例如miss you, be safe, come home soon。」哇，呢D「幸福日常」已經係超級sweet、超級窩心喇！

行動方面，Phil就不時為老婆準備早餐：「佢起身仲要化妝，都要化好耐，咁會肚餓㗎嘛。」貼心到呢！但換轉當Phil拎住一袋二袋樂器去開工之際，Rikko 亦會主動做柴可夫揸車載佢，甘願做佢背後嘅小女人。

圖：Phil/IG

後記：好閃呀！
訪問未開始前，小編已發現Phil 同Rikko不時手拖手，依偎一起。到訪問到尾聲時，小編叫兩人錫錫，點知Phil只係青蜓點水，正當Rikko以為老公怕整花唇妝時，原來Phil係有苦衷：「我病咗呀，唔想傳染佢。」呢個閃光彈真係閃親小編呀！

場地提供：W Hong Kong

Text_Edith （Editor's Blog）

林奕匡與老婆：愛情路上的高山低谷

想緊貼更多結婚資訊？